Inisio / Ken Nos Ta
Historia di Radio Margaritha 90.3 FM a kuminsá ku direktor sr Francis Knepa, pashoná ku e herensia di pueblo di Korsou. E Herensia históriko i kultural aki ta keda reflehá den nos folklor, músika, arte, literatura, arkitektura, siensia i nos kustumbernan. Ta sr Knepa su ophetivo pa mantené e balornan aki bibu den nos pueblo organisando proyektonan i eventonan krioio na Kòrsou.
Pa por a logra esaki di un manera mas organisá i dirigi, sr Knepa, dia 27 di Yüli 1995 a lanta e Fundashon Jave’s Station. E meta di e Fundashon aki ta pa sigurá i sigui promové e herensia kultural di e pueblo di Kòrsou i mantené esaki bibu mei mei di e plueblo.
Pa por a alkansá e pueblo aun mas den su totalidat ku su aktividatnan i eventonan den tur area, Fundashon Jave’s Station, dia 10 di Mei 2015, a lansa un stashon di radio digital via internet bou di e nòmber “Radio Margaritha Online”. Na e mes un aña ei Fundashon Jave Station a apliká pa un lisensia pa transmishon FM i for di e tempu ei ta funshoná komo un Radio Emisora independiente bou di e nòmber Radio Margaritha 90.3 FM. Sr Knepa tin amplio konosementu den e trabou di radio dor di su trayektoria largu na diferente radio emisora na Kòrsou.
Provee pueblonan na Kòrsou i den henter Reino Hulandes radio ku programashon na Papiamentu ku ta kontribui na desaroyo intelektual, spiritual i sosial di hende ku énfasis riba nos balornan históriko, kultural, kustumbernan, arte, músika i literatura.
Kontribui na edukashon di un komunidat ku por opiná basá riba konosementu ophetivo i tambe konsientisá pueblo tokante su balornan úniko pa e por saka for di esakinan e forsa i sabiduria pa e por sigui konstrui na kresementu di pais Kòrsou.